Սուր բրոնխիտը բորբոքում է, որն ախտահարում է շնչուղիների բրոնխային խողովակները, սովորաբար հանկարծակի է ի հայտ գալիս և տևում է 3-10 օր:

Այնուամենայնիվ, բորբոքման լավացումից հետո հազը և խորխի արտադրությունը կարող են պահպանվել մի քանի շաբաթ:

Սուր բրոնխիտը սովորաբար առաջանում է շնչառական վիրուսով վարակվելու պատճառով: Ժամանակ առ ժամանակ այն կարող է առաջանալ բակտերիալ վարակի պատճառով, չնայած դա տեղի է ունենում ավելի քիչ, քան 10% դեպքերում: Դա կարող է առաջանալ նաև գրգռիչ նյութեր շնչելիս, ինչպիսիք են ծխախոտի ծուխը, գոլորշիները, փոշին և աղտոտված օդը:

Սովորաբար բորբոքումը սկսվում է քթից կամ կոկորդից և տեղափոխվում է դեպի բրոնխիալ խողովակներ:

Երբ մարմինը փորձում է պայքարել վարակի դեմ, այն հանգեցնում է բրոնխիալ խողովակների այտուցվածության, ինչի պատճառով էլ հազ է առաջանում: Հազը կարող է երբեմն չոր լինել, բայց դրա միջոցով սովորաբար խորխը դուրս է հանվում: Բրոնխիալ խողովակների բորբոքումը նվազեցնում է նաև օդի ծավալը, որը կարող է անցնել բրոնխիալ խողովակների միջով: Սա իր հերթին կարող է առաջացնել խզզոց, կրծքավանդակի հատվածում սեղմում և հևոց:
Ի վերջո, իմունային համակարգը պայքարում է վարակի դեմ:

Սուր բրոնխիտի ամենատարածված ախտանիշներն են`

• Հիվանդը հազում է խորխով, որը կարող է լինել դեղին կամ կանաչ: Սուր բրոնխիտը սովորաբար տևում է 3-10 օր:
• Կողոսկրերի ցավ` երկար տևած հազի հետևանքով
• Խզզոց կամ սուլոցի ձայն շնչելիս
• Հարբուխ և քթի փակվածություն, որը սկսվում է կրծքավանդակի հատվածում սեղմվածության զգացումից մի քանի օր առաջ
• Թուլության կամ հոգնածության զգացողություն
• Ակտիվության նվազում

Սուր բրոնխիտը ժամանակավոր հիվանդություն է և սովորաբար չի առաջացնում մշտական շնչառական դժվարություններ: Այնուամենայնիվ, թուլացած իմունային համակարգ կամ առողջության այլ լուրջ խնդիրներ ունեցող անձանց մոտ հնարավոր է զարգանան ծանր խնդիրներ, ինչպիսիք են թոքաբորբը կամ շնչառական անբավարարությունը: Սուր բրոնխիտի արդյունքում լուրջ խնդիրներ ունենալու վտանգի տակ գտնվող մարդիկ են.

• Տարեցներ
• Փոքր երեխաներ
• Մարդիկ, որոնք ունեն այլ լուրջ առողջական հիվանդություններ, այդ թվում` քաղցկեղ կամ շաքարային դիաբետ
• Մարդիկ, որոնք չեն պատվաստվել գրիպի, թոքաբորբի և կապույտ հազի դեմ

Սուր բրոնխիտի ռիսկի գործոնները ներառում են`

• Սերտ շփում մեկի հետ, որի մոտ առկա է մրսածություն կամ սուր բրնխիտ
• Տարիքին համապատասխան պատվաստումները չստանալը
• Ծխախոտի ծխի, գոլորշիների, փոշու և աղտոտված օդի ազդեցությունը

Սուր բրոնխիտով հիվանդանալու հավանականությունը նվազեցնելու համար հետևյալ քայլերը կարող են օգնել`

• Ձեռքերը պարբերաբար լվացեք վիրուսների և բակտերիաների ազդեցությունը նվազեցնելու համար
• Պատվաստվեք գրիպի դեմ ամեն տարի
• Խորհրդակցեք ձեր բժշկի հետ թոքաբորբի դեմ պատվաստում ստանալու վերաբերյալ, հատկապես, եթե 60 տարեկան եք կամ ավելի բարձր
• Դադարեցրեք ծխելը
• Դիմակ կրեք բերանի և քթի հատվածում, երբ օգտագործում եք թոքերի գրգռիչներ, ինչպիսիք են ներկը, ներկը մաքրող միջոցը կամ լաքը